Sugatan ang tatlo katao matapos na pagbabarilin sa loob ng isang videoke bar sa Barangay Budiong, Odiongan, Romblon kagabi.
Kinilala ang mga biktima na sina Rodel Faalam, 30; Ruben Fetilo, 47; at Judie Toledo, 50, pawang mga residente ng Odiongan, Romblon. Habang ang mga suspek naman ay kinilalang sina Delano Lachica Maquinto, 59, residente ng Progreso Weste, Odiongan; at Faustino Dalisay Aguilar o mas kilala sa allias na ‘Onyot’, 47-taong gulang, at residente ng Barangay Cogon, Looc, Romblon.
Batay sa imbestigasyon ng Odiongan Municipal Police Station, nagsimula ang gulo nang biglang sakalin ng suspek na si Maquinto ang isa sa mga waitress ng isang videoke bar. Nakapalag ang waitress at nakatakbo palabas at hinabol ng suspek, dito na bumunot ng caliber .38 na baril ang suspek at nagpaputok sa bar kung saan tinamaan ang tatlo.
Nagtumbahan ang tatlong biktima at agad namang dinala ng mga saksi sa Romblon Provincial Hospital habang ang dalawang suspek ay umalis tumakas.
Naaresto ang dalawa matapos ang hot pursuit operation ng pulisya. Dito nila nakuha ang baril na ginamit sa pamamaril, isang bladed weapon, at mga bala na nasa possession ng suspek na si Maquinto. Ayon sa pulisya, lasing umano ang dalawang suspek nang mangyari ang insidente.
Nakakulong na ngayon ang dalawa sa Odiongan Municipal Police Station at nahaharap sa kasong Three Counts of Frustrated Murder.
{googleads center}
