{googleads center}
Nagkasugat-sugat ang katawan ng isang rider matapos na maaksidente nitong hapon ng Sabado sa Barangay Poctoy, Odiongan, Romblon.
Kinilala ni Police Senior Inspector Manuel Fernandez Jr., ng Odiongan Municipal Police Station ang rider na si Joseito Fabella Bunda, 49, isang karpentero at residente ng Barangay Libertad.
Ayon sa imbestigasyon ng pulisya, pauwi na sana ang rider galing at sa Barangay Poctoy dumaan imbes na sa National Road ngunit pagdating sa pakurbang bahagi ng kalsada ay hindi niya naliko ang kanyang motor at sumalpok sa nakaparadang tricycle.
Tumilapon ang rider palayo sa kanyang motor at humandusay sa gitna ng daanan.
Agad na isinugod naman ang rider ng mga rescuers sa Romblon Provincial Hospital para gamutin habang ang kanyang motorsiklo ay dinala sa Odiongan Municipal Police Station.
Ayon sa mga saksi, nakainum umano ang rider at naamoy pa ang kanyang alak ng siya ay kanilang lapitan.
