Dahil umano sa isang tsismis, nagtalo at nasabunutan ang dalawang babae sa gitna mismo ng kalsada sa Barangay Batiano, Odiongan, Romblon bandang alas-5 ng hapon kahapon, September 03.
Ayon sa spot report ng Odiongan Municipal Police Station, bigla umanong sinugod ng isang Razel Natividad, 25, ang isang Len Acuña, 31 sa loob ng isang videokebar sa lugar na nagresulta ng sabunutan ng dalawa.
Ayon naman sa mga saksi, habang nagtatalo ang dalawa biglang kumuha umano ng kitchen knife ang kapatid ni Len Acuña na si Lea para sana putulin ang buhok ni Len upang matanggal sa pagkakapulupot sa kamay ni Natividad.
Ngunit ikinagulat umano ito ng mga nakiki-usyuso at sinubukang awatin si Lea na naging dahilan naman umano ng pagtalsik ng kutsilyo sa kaliwang bahagi ng tiyan ni Natividad na nagresulta ng kunting galos.
Dinala si Natividad sa Romblon Provincial Hospital para tingnan ang kundisyon habang ang magkapatid na Acuña ay tumungo sa Odiongan Municipal Police Station para magbigay ng pahayag.
Ayon sa Odiongan PNP, nai-referr na umano ang dalawa sa barangay para doon nalang mag-usap ng kanilang mga problema.
{googleads center}
