Aabot sa 87 katao ang sugatan matapos na sumalpok sa lupa sa may Calatrava, Romblon ang barkong M/V Maria Matilde ng Montenegro Shipping Lines Inc. pasado alas-5 ngayong umaga, September 26.
Patungo ang barko sa Romblon Port galing Odiongan Port para ihatid ang ilang pasahero na sakay nito galing Batangas.
Ayon kay Cajidiocan SB Member Marvin Ramos na isa sa mga pasahero ng barko, nagising umano siya dahil akala niya may malakas na sumabog yun pala ay bumangga ang kanyang sinasakyang barko. Noong una akala niya sa maliit na isla lang sila sumalpok pero nakita niya ng umatras ang barko na isla ng Tablas ang nasalpok ng barko.
Nakausap niya umano ang Chiefmate ng barko at sinabi nito sakanyang, na iba ang naka duty noong oras na sumalpok ang barko at nagkaroon rin ng failure sa gps.
Sa lakas ng pagkakasalpok ng barko, nayupi ang unahang bahagi nito, nagtumbahan ang ilang aircon, at nasugatan rin ang ilang pasahero matapos na tumilapon sa higaan. Sa pangkalahatan, ang barko ay may sakay na 251 na pasahero. Dinala ang mga nasugatang pasahero sa Romblon District Hospital para bigyan ng paunang lunas.
Ayon sa Romblon Police Provincial Office, aabot sa 500,000 ang halaga ng damage sa mga sasakyan habang hindi pa tukoy ang total damage ng barko.
Inimbeta na ng Pulisya ang kapitan ng barko sa police station at sinabi nitong malakas umano ang ulan kanina at zero visibility kaya hindi nakita kung saan patungo ang barko ngunit hindi ganun ang kwento ng mga pasahero. Ayon sa kanila, wala umanong ulan at maayos rin ang alon kaninang umaga nang mangyari ang aksidente.
Nakadaong rin sa Romblon Port ang barko matapos ang dalawang oras.
{googleads center}
