“Inaasahan po natin na ang ating Sangguniang Bayan ay aksyunan po ang sitwasyon po sa ating mga tricycle at mga kolorum [na tricycle] para po sa taong bayan.”
Ito ang naging pahayag ni Mayor Trina Firmalo-Fabic sa kanyang unang State of the Municipality Address o “Ulat Sa Bayan” nitong umaga ng July 31.
Layunin umano ng munispyo at ng kanyang pamamahala na magkaroon na ng solusyon sa sitwasyon sa problema ng mga transportasyon sa Odiongan.
Unang naiulat ng Romblon News Network nitong nakaraang linggo ang problemang isinumbong ng ilang estudyante sa Odiongan laban sa ilang tricycle drivers.
Ang ilan umanong tricycle drivers ay namimili ng pasahero at minsan ay naniningil pa ng mas mahal kahit malapit lang ang destinasyon.
Read More: Ilang estudyante sa Odiongan, inirereklamo ang mga tricycle na mapili sa pasahero
{googleads center}
Isa umano sa mga panukala ng Sangguniang Bayan para sa nasabing problema ay ang magkaroon ng taripa para sa mga tricycle para hindi na umano umangat ang presyo ng mga pamasahe.
Maliban sa problema sa tricycle, inihayag rin ni Mayor Fabic na magkakaroon na ng South Terminal na itatayo sa Barangay Tulay.
Dito na umano paparada ang mga jeep na galing o patungong mga bayan ng Looc, Ferrol, Alcantara, Sta Fe., at Sta. Maria o mga sasakyang biyaheng Southern Part ng Tablas Island; habang ang terminal sa Public Market ay tatawaging North Terminal kung saan paparada naman ang mga sasakyang biyaheng Norte.
Solusyon rin umano ito para mabawasan ng traffic sa sentro ng bayan ng Odiongan.
