Naaresto ng mga kapulisan ng Cajidiocan Municipal Police Station at San Fernando Municipal Police Station sa ikinasang joint operation laban sa notorious umanong magnanakaw ng cellphone na si Jhon Ivan ‘Asyong’ Rubio, residente ng San Fernando, Romblon.
Ayon sa nakuhang impormasyon ng Romblon News Network, naaresto umano ang suspek nitong Linggo ng tanghali matapos na maaktuhang bumababa sa motorsiklong kanyang ninakaw sa Barangay Danao ng bayan ng Cajidiocan.
Tinakas umano ito ng suspek sa nasabing lugar at tumigil at iiwan sana ang motorsiklo sa Barangay Panangcala sa bayan ng San Fernando. Tatago sana siya sa ilalim ng tulay ng Panangcalan ngunit dito siya naabutan ng mga operatiba.
Ang nasabing suspek ay inrereklamo na rin ng mga residente ng tatlong bayan ng Sibuyan dahil sa hinilang ito ang suspek sa sunod-sunod na nakawan ng cellphone sa mga nasabing lugar. Maaring ito rin umano’y suspek sa ilang akyat bahay modus sa lugar.
Dinala na si Alyas Asyong sa Romblon Provincial Jail sa bayan ng Romblon, Romblon para ikulong.
Hindi nagbigay ng pahayag ang suspek.
