Tutungo ngayong Hunyo sa Odiongan, Romblon ang mga kawani ng Professional Regulation Commission (PRC) upang irehistro ang mga bagong professionals at pagpapanibago (renewal) ng mga lisensya ng mga dati nang professionals.
Tatanggapin din ng PRC ang aplikasyon ng mga nagtapos ng kurso sa pagtuturo na nais kumuha ng September 2017 Board Licensure Examination for Professional Teachers (BLEPT).
Ang napipintong pagdating ng PRC sa Romblon ay bilang tugon sa kahilingan ng tanggapan ng gobernador at Public Employment Service Office na maghatid ng mobile services sa lalawigan sa Hunyo 23-26 na gaganapin sa Romblon State University (main campus).
Nanawagan si PESO Provincial Manager Alicia C. Fetalvero sa mga professionals at mga nakapagtapos ng Bachelor of Elementary Education o Bachelor of Secondary Education na samantalahin ang pagkakataong ito upang makatipid sa gastusin ng pagpoproseso ng kanilang lisensiya at aplikasyon para sa eksaminasyon.
Inaasahan ng pamahalaang panlalawigan na matagumpay na maisasakatuparan ang programa at maraming makikinabang dito dahil kusang inilalapit ng pamahalaan ang serbisyo sa mga mamamayan
Para sa karagdagang detalye at katanungan, maaaring tumawag o magtext kina PESO Prov’l. Manager Alicia Fetalvero sa 0928-343-4511, Yolanda Fegurasin sa 0921-261-9523 at Lotlot Salivio sa 0928-282-7032.
