Isang lalaking residente ng San Fernando, Romblon ang inirereklamo ng ilang residente dito dahil ito umano ang suspek sa sunod-sunod na nakawan ng cellphone at ilang gamit ng bahay sa bayan ng San Fernando sa Sibuyan.
Nadiskobre umano ng ilang residente nitong nakaraang linggo na nawalan pala sila ng ilang gamit ng bahay iba pa sa cellphone na akala nila'y nawala o nahulog lang sa daanan.
Nitong nakaraan rin, isang motorsiklo ang natagpuan ng pulisya sa Magdiwang, Romblon na di umano'y nakaw galing sa bayan ng San Fernando at ang pinaghihinalaang gumamit ay ang suspek na si Jhon Ivan ‘Asyong' Rubio.
Ayon sa San Fernando Police, nagtago na umano at hindi nagpapakita sa kanyang tirahan sa San Fernando ang lalaki matapos ang pagkaka diskobre sa motorsiklo.
Hindi rin umano nila itinuturing na wanted ang nasabing lalaki dahil wala naman umanong pormal na nagrereklamo sa kanilang opisina kaugnay sa mga nagawa nito.
Patuloy naman ang pagbibigay ng impormasyon ng San Fernando Municipal Police Station sa mga kabahayan upang magbigay ng paalala para maiwasang manakawan.
Hiling ng San Fernando Police kay Rubio, sana'y isauli na nito ang mga cellphones na kaniyang ninakaw at humingi na ng pasensya sa mga taong naperwisyo dito.
Nitong nakaraang araw, isang Facebook Account na may pangalang ‘Jay-Ar Seguel Yamayo Ibara' ang nagcomment sa post ng mamahayag na si Juvy Fabon.
“mga G*** kahit kailan hnd aku aalis ng cbuyan lalaban aku ng patayan lalo kna na nag post, **** u ka”, ayon sa Facebook Account na pinaghihinalaang may-ari ng nasabing lalaki.
