Pinangunahan ng Provincial Disaster Risk Reduction and Management Office (PDRRMO) ang matagumpay na pagsasagawa ng unang National Simultaneous Earthquake Drill (NSED) exercises sa Municipal Hall ng San Agustin, Romblon kamakailan.
Nilalayon ng earthquake drills na sanayin ang mga kababayan sa mga wastong pagkilos gaya ng “duck, cover and hold” para iwas-pinsala o pagbuwis ng buhay.
Ang pagsasanay na nilahukan ng mga kawani ng munisipyo, kapulisan, bumbero, coast guard, Red Cross volunteers, health workers ng Tablas Island District Hospital, opisyal ng pamahalaang bayan, at iba pa.
Sa pamamagitan ng scenario kung saan naganap ang 7.8 magnitude na lindol dahil sa paggalaw ng Tablas Fault at nakatanggap ng tawag ang PDRRMO mula sa MDRRMC San Agustin na humihingi ng saklolo dahil sa nagkaroon ng mga collapsed sa gusali at nagdulot ng sunog sa bahagi ng Municipal Building, may lima kataong nagkaroon ng head injury, apat na may leg injury, apat na may arm injury, anim na nawawala at apat na natagpuang patay, mabilis na kumilos ang lahat ng miyembro ng PDRRMO upang tugunan ang mga naging biktima nito.
Itinayo ang Incident Command Post (ICP) at nagsagawa ng briefing sa lahat ng mga teams na idedeploy upang tumulong sa mga biktima ng kalamidad.
Ayon kay PDRRM Officer Engr. Antonio P. Sarzona na nagsagawa ng briefing, kinakailangang tantiyahin ng mga responders kung ligtas ang mga lugar na kanilang pupuntahan at dapat siguruhing hindi lamang ang mga tao ang ililigtas kundi maging ang sarili sapagkat sa panahon ng kalamidad ay kinakailangan ng dobleng pag-iingat ang mga responders.
Matapos ang drill,nagsagawa ng post evaluation sa mga naging pagkilos at pagtugon sa naturang aktibidad upang siguruhin na maitama ang mga may kakulangan at mapanatili ang mga tamang bahagi ng pagsasanay.
Ayon kay San Agustin Mayor Esteban Santiago F. Madrona, isang maituturing na good point ang paglalagay ng incident command post at ang pagbibigay ng incident commander ng update sa mga opisyal kung ano ang nangyayari sa ginagawang pagri-rescue.
Matagumpay sa pangkalahatan at nabigyan ng mataas na grado ng mga nagsilbing evaluator ang mga nakibahagi sa drill.
