Ibinasura ng Regional Trial Court Branch 82 ang kaso na isinampa ng isang babae laban kay Mark Kelvin Maddawin dahil hindi na umano interesado ang biktima na ituloy ang kasong Acts of Lasciviousness laban kay Maddawin.
Matatandaang si Maddawin ay inaresto ng kapulisan dahil umano sa panhihipo ng maselang bahagi ng katawan ng isang babae nitong nakaraang taon sa may bahagi ng opisina ng OTELCO sa Barangay Liwanag sa Odiongan.
Mariin itong itinanggi ni Maddawin at sinabing hindi siya ang suspek na tinutukoy ng babae.
Ayon kay Maddawin, tapos na umano ang kaso niya dahil inamin ng babae na nagsampa ng kaso sakanya na hindi siya ang suspek at napagkamalan lamang siya.
Sinabi ni Maddawin sa Romblon News Network noong nakaraang mga buwan na may mga ibedensya umano siyang makakapag patunay na kasama niya ang asawa niya at pamilya ng asawa niya ng panahong nabiktima ang sinasabing babae. Maikli na rin umano ang buhok niya ng panahong iyon dahil dumalo umano siya sa isang kasal. Maaring biktima lang umano siya ng mistaken identiy.
“Opo,. At saka tatlong babae daw ung nahipuan noon,. Kasi pinagharap harap kami sa police station,. Ung dalawang babae hndi ako ang suspek ung isang babae lang ang tinuturo ako at ung bibig ko lang daw po ang palatandaan nya,.so sino pala ung suspek ng dalawang babae??? Ibig sabihin ba nito maraming nanghihipo dto sa odiongan?,. Sino paniniwalaan natin ung dalawang babae na hndi ako ang tinuturo o ung isang babae na ako daw ang gumawa at palatandaan ay ung bibig ko lang,.” mensahe ni Maddawin sa Romblon News Network.
