Matapos ang ilang araw na monitoring ng Odiongan Municipal Police Station kasama ang mga barangay officials ng Barangay Canduyong at Budiong sa bayan ng Odiongan, naaresto na nitong tanghali ng Miyerkules, March 22, ang lalaking gumagala umano sa mga nabanggit na Barangay tuwing gabi.
Ayon sa lalaki, siya ay si Joseph Rada, 25 taong gulang at galing pa umanong Barangay Azagra, San Fernando, Romblon.
Tugma ang description sa lalaki ng mga nakakita rito na nakausap ng Romblon News Network nitong Lunes sa Barangay Budiong.
{googleads right}
Paliwanag niya, hindi naman talaga umano siya magnanakaw ng mga gamit ngunit inutusan umano siya ng isa sa mga kasama niya na kumuha para may pang pamasahe pauwi ng Sibuyan.
Pumunta umano siya sa Odiongan dahil sa alok umanong trabaho ng kanyang tatlong kasama ngunit pagdating niya rito ay wala naman ang pangakong trabaho sa construction.
Hindi rin umano siya ang pumatay sa baka na nakita sa bundok ng Barangay Budiong kundi mga kasama niya umano.
Mahigit isang linggo ring napuno ng takot at pangamba ang dalawang barangay sa Odiongan dahil na rin sa mga usap-usapang may dala umanong patalim ang suspek.
Sa ngayon, nakapiit na ang suspek sa Odiongan Municipal Police Station at nakatakdang kasuhan ng kaukulang kaso.
