Aabot sa mahigit 200 na kalahok ang nakiisa sa katatapos lang na 2016 Provincial Consumer Congress ng Department of Trade and Industry Romblon sa Holiwood Inn Hotel sa bayan ng Odiongan, Romblon nitong October 06.
Ang nasabing congress ay bahagi ng pagdiriwang ng Consumer Welfare Month na may tema ngayong taon na ‘Consumer Protection: A Shared Responsibility'.
Sa nasabing forum tinalakay ni Atty. Miralyn Opriasa ng SEC Enforcement & Investor Protection at ni Atty Minerva A. Sobreviga-Retanal ng Anti Fraud Divison ng National Buureau of Investigation ang isa sa mga laganap na modus ngayon, ang investment scams.
Ang mga investment scams umano ay ang paghikayat sayo ng ilang tao na mag invest sa isang business at paasahin ka ng mataas na kita sa loob lamang ng ilang araw o linggo.
Tinalakay rin ng mga bisitang sina Ms. Carolina C. Saunar ng Public Assistance Desk & Record Division ng Philippine Contractors Accreditation Board (PCAB) Licensing ang trabaho ng kanilang opisina habang si Ms. Anerose N. Dumaquita naman ng PCAB ay binahagi kung paano pumapasok ang isang firm sa isang government projects katulad ng mga pagpapatayo ng mga kalsada.
Ilang estudyante naman ng Civil Engineering ng Romblon State University na dumalo sa nasabing congress ang nagtanong patungkol sa mga ibinahagi ng PCAB.
Nagbigay rin ng lecture si Ms. Joann Chuaquico ng DTI-MIMAROPA kaugnay naman sa Philippine Government Electronic Procurement System o PhilGEPS.
Ayon naman kay Mr. Orville Mallorca, OIC-Provincial Director ng DTI-Romblon, malaking tulong ang nasabing consumer congress sa mga business at consumer sectors para nakukuha nila ang side ng isa't isa.
Handa rin umanong sumagot ang kanilang opisina sa mga reklamo laban sa mga hindi magagandang gawain ng mga negosyo sa lalawigan. Maari umanong dumulog sa opisina nila o bisitahin ang kanilang Facebook page.
