Sugatan ang isang pulis matapos umanong panain ng isang lasing na lalaki sa kalsada sa bayan ng Alcantara, Romblon kahapon ng hapon.
Sa spot report ng Alcantara Municipal Police Station, mag-aalas 6 ng gabi kahapon ng madaanan ng naka sibilyan na pulis na si PO1 Fernando Lucidus, 32 years old, residente ng Barangay San Roque ang lasing na suspek na si Rene Galicha, 32 years old, residente naman ng Barangay Bonlao sa kalsada na naghaharang ng mga dumadaan.
Lasing na lasing umano itong si Galicha kaya bumaba itong pulis at nagpakilala at sinabihan na umalis na sa kalsada dahil humaharang siya sa mga dumadaan.
Ngunit hindi sinunod ito ng suspek at bigla niyang pinana ang pulis sa paa gamit ang pana para sa isda.
Nakuha naman agad ng pulis ang pana ng suspek bago niya pa man ito muling magamit.
Dinakip ang suspek ng mga rumespondeng pulis at barangay tanod. Ayon sa mga residente ng barangay, nakaubos umano ang suspek ng dalawang litrong Emperador Lights bago ito pumunta sa kalsada.
Sinubukan kapanayamin ng Romblon News Network ang suspek ngunit hindi ito nagpaunlak.
Nakakulong na ang suspek at kakasuhan na ng pulisya ng direct assault.
