Tinambangan at binaril ang sasakyan ng isang retired na pulis sa bayan ng San Andres, pasado alas-6 kagabi.
Pauwi na umano galing Odiongan ang dating Pulis na kinilalang si Retired Police Senior Inspector Arturo Cortez, 68-taong gulang, patungo sa kanyang lugar sa Barangay Tan-agan.
Kwento ni Cortez, bandang Barangay Tumingad sa bayan ng Odiongan, napansin na niyang may sumusunod sa sasakyan niya at biglang nag overtake itong motor na may angkas na dalawang lalaki pagdating ng boundary ng Barangay Libertad at Panique sa Odiongan parin.
Pagdating niya umano sa may kampo ng CAFGU sa boundary ng Odiongan at San Andres, nakita niya umano ang dalawang lalaki na naka park na sa gilid ng kalsada at ng dumaan ang sasakyan niya ay bigla siyang pinaputukan.
Hindi naman nagtamo ng galos o tama ang biktima na agad na nakapagsumbong sa pulisya.
Nakapag responde pa ang mga sundalo sa lugar ngunit hindi na nila naabutan ang suspek.
Wala namang pahayag ang biktima kung ano ang maaring dahilan ng pagtambang sa kanya.
