Tiklo sa buy-bust operation bandang 2:30 ngayong hapon ng pinagsamang pwersa ng Focus Team ng Philippine National Police sa pangunguna ni PCInsp Romulus Gadaoni, Odiongan Municipal Police Station sa pangunguna ni PSInsp Manuel Fernandez Jr., at ng Philippine Drug Enforcement Agency (PDEA) 4B ang isang barangay kagawad sa bayan ng Odiongan na di umanoy tulak ng iligal na droga sa lugar.
Arestado si Greg Oquendo, 52-taong gulang, at Barangay Kagawad ng Barangay Liwanag sa bayan ng Odiongan, Romblon sa kanyang pamamahay sa nasabing barangay.
Nakuha sa suspek ang dalawang pirasong sachet na may lamang pinaghihinalaang shabu, at P500 na marked money, at ilang drug paraphernalia.
Ayon sa suspek, hindi umano sakanya ang mga shabu, ngunit inamin niyang gumagamit siya ng iligal na droga.
Ayon naman sa awtoridad, kabilang ang suspek sa mga High Value Target sa bayan ng Odiongan at pasok rin sa Top 10 drug watchlist ng Odiongan MPS.
Ayon naman sa Barangay Captain ng Barangay Liwanag na si Tikboy Fernandez, pinagsabihan niya na ang nasabing kagawad na tumigil sa iligal na droga ngunit hindi siya nag paawat.
Nakakulong na ang suspek sa Odiongan Municipal Police Station at nahaharap sa kasong paglabag sa RA 9165.
