Nagpang-abot sa suntukan ang isang Sangguniang Bayan member at Association of Barangay Councils (ABC) President ng San Andres, Romblon sa loob mismo ng session hall ngayong araw.
Ayon sa San Andres Municipal Police Station, ang dalawa ay sina Sangguniang Bayan member Agiedo Mortel at si Association of Barangay Councils (ABC) President Doroteo Aquino.
Batay sa mga nakasaksi sa loob ng session hall, nagsimula umano ang suntukan habang nagbibigay umano ng pahayag si ABC President Aquino sa harap ng mga saksi at kay SB Mortel ukol sa di umanoy reklamo sa kanya na pagharang sa isang proyekto ni Mayor Fernald G. Rovillos sa kanilang barangay sa Calunacon ng biglang komprotahin ni SB Mortel si ABC Aquino at sinabihang sinungaling.
Agad namang inawat ng mga tao sa loob ng session hall ang dalawa ngunit ilang sandali lang ang nakalipas muling nag bangayan ang dalawa at dito na sila dinala sa San Andres Municipal Police Station.
Nagkasundo naman umano ang dalawa sa opisina ng pulisya at sinabing hindi na magsasampa pa ng reklamo, ayon sa San Andres MPS.
Sa panayam ni Awe Eranes ng Radyo Natin Odiongan kay SB Mortel, inamin niyang nag-init ang ulo niya dahil nagsinungaling umano si Aquino ukol sa pagharang umano niya sa proyektong paglalagay ng mga solar street lights magmula sa bayan ng Poblacion patungo sa Barangay Calunacon.
Paliwanag ni Mortel, mismong si dating SB member Galos na mismo ang nagsabi at witness sa pagharang ni Aquino sa proyekto at pinilit lang umano ito na ilagay sa kanilang barangay kahit hindi payag si Aquino.
Ayon naman kay Aquino, pumayag siya na inilagay at hindi siya tutol. Ayon sa kanya, kung hindi umano siya pumayag, sana hindi umano nailagay ang mga nasabing street lights sa kanyang lugar.
Si Aquino ay kakaupo lang bilang bagong ABC President matapos na pamunaw ang kapitan ng Poblacion na si Barangay Captain Gadon.
