Isa sa mga dapat tutukan at bigyang pansin ng ating lokal na pamahalaan ngayon ay kung paano pausbungin at pasiglahin ang industriya ng turismo. Ang ating probinsya ay kilala lamang sa bansag na sentro ng pagawaan marmol ngunit kung ating titingnan ang datos ng mga turistang bumibisita sa ating probinsya, ito ay maliit lamang.
Dumagdagsa lamang ang ating bisita tuwing pasko at semestral break. Kung ating susuriin ang mga taong bumibisita sa mga panahong nabanggit ay mga balik probinsya lamang at hindi natin maituturing na turista. Ang tunay na kahulugan ng salitang turista ay nakabase sa kanilang sadya ng pagbisita kagaya ng leisure at adventure activities na maibibigay ng isang lugar.
Ang probinsya natin bahagi ng tinatawag na Central Philippines Region na itinatag taong 2006 para makasama sa pag angat ng turismo ng iba nating mga karatig na probinsya ngunit ang naging epekto nito ay hindi naramdaman sa loob ng halos sampung taong lumipas. Anu ang kulang at ano ang mga hakbang na dapat gawin para makasabay tayo sa ibang probinsya kagaya ng Marinduque at magkaroon tayo ng sariling market?
Sa unang pagkakataon nahingan ko mga suhestyon ang Honorary Consul of Latvia to the Philippines na si Dr. Bobby Joseph na isa rin sa mga consultant ng kasalukuyang Kalihim ng Kagawaran ng Turismo na si Sec. Wanda Corazon Teo kung paano mapausbong at mapalaganap ang kultura ng turismo sa ating probinsya.
- Dapat bumuo ng destinasyon sa ating probinsya. Ang kahulugan ng destinasyon ay pagkakaroon ng isang lugar ng humigit kumulang na 1,500 bahay tuluyan o hotel rooms para sa mga turista. (Goeldner and Ritchie, 2012)
- Bumuo ng kultura ng turismo sa pamamagitan ng pagbibigay ng seminar sa mga stakeholders (may ari ng mga resorts, restaurants, mga residente, NGO at LGU) para magkaroon ng tamang pananaw sa pagtanggap ng mga bisita;
- Gumawa ng SWOT Analysis sa kasalukuyang establisyemento na may kaugnayan sa turismo;
- Bumuo ng “food tourism” na kultura at magbigay ng libreng pagsasanay sa mga interesado at mga negosyante;
- Magtatag ng “Farm Tourism or Leisure Farm Tourism”;
- Pag aralan ang flight operation kung paano makahikayat ng mga turista na bumibisita sa Boracay na dumaan sa Tablas;
- Pag aralan ang antas ng suporta na pweding ibigay ng bawat munisipyo (LGU);
- Hikayatin ang mga dayuhan na nakatira sa ating probinsya na magtatag ng samahan kung paano makatulong sa pag usbong ng turismo.
Sa mga nabanggit na mga mungkahi, una kailangan nating magkaroon ng sapat na bilang ng mga bahay tuluyan o resort hotel. Sa mga lugar gaya ng Ilocos Norte lalo na sa Pagudpod, hindi sinang ayunan ng mga lokal ang pagsasapribado ng mga piling lugar at pagkakaroon ng maraming resorts kaya sinanay nila ang mga residente kung paano tumanggap ng mga bisita at binigyan ng permit ang mga piling kabahayan para ikonsiderang bahay tuluyan.
Ang sitwasyong ito may maaring isagawa sa mga bayan na malapit sa daungan at paliparan tulad ng Odiongan, Looc, Alcantara, San Agustin, Romblon, Cajidiocan at San Jose. Dapat rin na mabigyan ng pagsasanay ang mga stakeholders ng mga nasabing bayan para matutunan nilang matanggap ang benipisyo na dala ng turismo. Makabubuti ring suriin kung anu ang kalakasan, kahinaan, mga oportunidad at banta ng mga establisyemento na may kaugnayan sa turismo para mabigyan ng tulong mula sa LGU.
Isa rin sa mga dapat pagtuunan ng pansin ng ating pamahalaan ay ang pagkakaroon ng sariling pagkakakilanlan ng ating probinsya pagdating sa pagkain. Tanging “bukayo at sarsa” lamang ang matunog na pagkain sa ating lugar. Kailangang magkaroon tayo ng produkto na pwedeng iluwas sa Maynila ng mga turistang pumupunta sa ating bayan. Isang halimbawa ay ang probinsya ng Camiguin na kung saan sila ay kilala sa Lanzones ngunit mas nakilala sila sa Pastel. Hindi ito kailangang iugnay sa ating nakaugalian.
Ang panglimang mungkahi ni Dr. Joseph ay magkaroon ng Leisure Farm sa ating probinsya. Ang ideyang ito ay nasimulan na ng ilan sa mga dayuhang naninirahan sa lugar kagaya ng Cumming Higlands sa Looc. Dapat ring bigyang pansin kung paano palakasin ang flight operation papuntang Tablas at kung paano natin mahikayat ang ibang turista na piliing isama sa kanilang itinerary ang Romblon bago o pagkatapos nilang pumunta ng Boracay. Isa rin sa pinakamahalagang gampanan ng mga lokal na opisyal ay ang suporta kung paano at anung mga activities ang pwede nilang gawin.
Mahalagang magkaroon ng Tablas Week, Sibuyan Week at Romblon Week na kung saan magkakaroon ng paligsahang pang turismo tuwing bakasyon kagaya ng festival para buhayin ang mga nakaugaling kultura ng ating bayan. Ang pagbuo ng samahan ng mga dayuhan sa ating lugar para maiangat ang turismo ay makatutulong para mas marami pang mga dayuhan o balikbayan ang mahikayat na magtayo ng magagandang resort sa ating lugar.
Si G.Briones ay laking Alcantara at isang Tourism Professor at kasalukuyang Department Chair ng International Hospitality Management sa University of the East, Manila. Nagtapos ng kursong Master of Science in Tourism Management at Doctor of Philosophy in Business Management taong 2013 at nagawaran ng Best Research sa Asia Pacific Council on Hotel, Restaurant and Institutional Education noong 2013. Kanya ring naipaipresenta ang isa sa kanyang mga research paper sa Harvard University noong nakaraang taon.
Para sa komento at suhestyon mag email sa zandee.briones@ue.edu.ph o sa instagram: zandee143
