Isinasagawa sa buong lalawigan ang pagbibigay ng deworming sa mga mag-aaral sa mga pampublikong paaralan kaugnay sa pagdiriwang ng National School Deworming Month ngayong buwan ng Hulyo.
Katuwang ng Department of Health (DOH) sa naturang programa ang Department of Education (DepEd) at Department of the Interior and Local Government (DILG) kung saan mga trained health workers ang siyang magbibigay ng immunization sa mga bata.
Target ng kampanyang Oplan: Goodbye Bulate na mabigyan ng libreng bakuna ang mga Grade 1 at Grade 7 sa buong bansa laban sa sakit na measles, rubella, tetanus at diphtheria.
Kaugnay ng programang ito, hinihikayat ng Department of Health (DOH)-Romblon Provincial Office ang mga magulang na pahintulutan ang kanilang mga anak na mabigyan ng libreng pampurga upang makontrol at maiwasan ang pagkakaroon ng ‘intestinal parasitic worm infections.
Ayon kay Dra. Ruth Cervo, chief ng DOH-Romblon, kanilang tinatawagan ng pansin ang mga magulang ng bata na na makiisa sa isinasagawang 2nd round ng Expanded National School at Community-Based Deworming Month.
Dagdag pa ni Cervo. hindi dapat matakot ang mga magulang na ipapurga ang kanilang mga anak sapagkat ang libreng gamot kontra-bulate na ipinamamahagi ng DOH ay ligtas.
Bago aniya isagawa ang pagpurga ay nagkakaroon ng seminar sa mga guro, estudyante at maging sa mga magulang upang malaman ang magagandang benepisyo sa pangangatawan, mga dahilan ng pagkakaroon ng bulate sa tiyan at mga paraan upang mapanatili ang kalinisan sa katawan at paligid.
Sinisiguro rin nilang busog ang mga batang iinom ng gamot kaya ito ay may libreng pagkain silang ibinibigay bago inumin ang matamis na branded chewable tablet na pampurga.
Hindi rin aniya nila pinapayagang makasamang bigyan ng gamot ang mga batang may allergies at kagagaling lang sa pagkakasakit.
Ihinayag din ni Cervo na malaki ang negatibong epekto ng bulate sa pag-aaral ng mga kabataan tulad ng panghihina at hindi makapag-concentrate sa pag-aaral dahil may kahati sa sustansiyang nakukuha ang mga bata sa kanilang mga kinakain.
Sa kasalukuyan ay umaabot na sa 90 porsiyento ng mga primary at secondary public schools mula kinder hanggang senior high school ang nabigyan ng gamot na pampurga ng mga health workers.
Hangad ng DOH-Romblon na makuha ang 100 porsiyentong compliance ng pagsasagawa ng programa sa buong lalawigan. Hinihimok din ni Cervo ang mga magulang na may anak na edad isa hanggang apat na taong gulang at maging yaong mga out-of-school youth na dalhin ang mga ito sa rural health center o barangay health station para mabigyan ng gamot pampurga na nasa ilalim naman ng community deworming program ng DOH.
Aniya walang dapat ikabahala ang mga magulang sa bayarin sa gamot pampurga sapagkat ito ay ipamamahagi ng walang bayad.
