by Dennis Manzo, Philippine Information Agency | Tuesday, 14 June 2016
Mahigpit na ipinatutupad ng Department of Education (DepEd)-Romblon ang “no collection policy” at “no uniform policy” sa lahat ng pampublikong paaralan sa buong lalawigan.
Sinabi ni OIC-Schools Division Superintendent Roger F. Capa, matagal na umanong sinusunod ng DepEd Romblon Schools Division Office ang No Collection Policy bilang pagtalima sa DepEd Order 41 series of 2012, na nag-uutos sa lahat ng school officials na wala ni isang sentimong sisingilin sa mga batang mag-aaral.
Alinsunod naman sa DepEd Order No. 45 series of 2008, hindi required na magsuot ng niporme ang mga estudyante at mga mag-aaral ng mga pampublikong paaralan.
Ang mahalaga aniya ay may suot ang mga ito na Identification Card na ginastusan naman mula sa school fund at hindi mula sa bulsa ng mga magulang.
Nilinaw naman nito na kapag wala pang uniform, hinihiling pa rin sa mga estudyante na magsuot ng plain shirts at kahit anung kulay ng pantalon sa mga lalaki, ganundin sa mga babae na kahit anung palda basta plain shirts ang kanilang isusuot.
Layunin nito na makatipid ang mga magulang sa kanilang gastos sa pagpapaaral ng kanilang mga anak.