by Dennis Manzo, Philippine Information Agency | Friday, 08 April 2016
Matiwasay na idinaos ang pag-arangkada ng motorcade sa kabayanan ng Odiongan kaugnay sa 2016 Tax Campaign at Tax Updates seminar na ginanap naman sa Romblon State University (RSU) Main Campus.
Dinaluhan ito ng mga negosyante, professionals, mamamahayag at iba’t ibang pribadong sektor. Layunin ng naturang aktibidad na magkaroon ng karagdagang kaalaman o kamalayan ang mga taxpayers hinggil sa kanilang obligasyon sa pamahalaan.
Nilalayon din ng programa na mabigyan ng wastong impormasyon ang lahay kaugnay sa mga nagawa ng BIR, kasama ang mga plano at estratehiya nito para sa maayos na pangongolekta ng buwis.
Ipinakilala ni Revenue Collection Officer Christy Mendez sa mga kalahok ang mga tagapagsalita at nangasiwa sa talakayan na kinabibilangan nina Accounting Examiner Diego Sarol, Cleofe Fabro, Chief, Administrative Section, Magie Falcunaya at Leah Fabiculana ng Collection Section.
Sa maikling pananalita ni Matea Bascon, OIC- Revenue District Office (RDO)-35, kanyang pinasasalamatan ang mainit na pagtanggap sa kanya ng mga taga-Romblon gayundin sa magandang pagtugon ng mga ito sa kampanya at programa ng kanilang ahensiya.
Ayon pa kay Bascon, ang Tax Campaign Kick-off ay taunang kampanya ng BIR para sa “Angat Pa Pilipinas” program ng pamahalaang nasyunal. At dahil na rin aniya sa kooperasyon ng mga taxpayers sa pagbabayad ay tumaas ang koleksiyon ng buwis bunsod na rin ng kanilang ipinaiiral ng Register File and Pay (RFP) procedure.
Angat rin aniya ang sistema ng pagbubuwis dala ng teknolohiya kung saan ay makapagbabayad na on-line. Ipinaliwanag din nito na dapat magbayad ng tamang buwis dahil ito ang bumubuhay at nagpapatatag sa katayuan ng pamahalaan o ekonomiya ng bansa.
“Ang taxes ang nagbibigay buhay sa gobyerno at sa mga pangangailangan ng taumbayan, mayaman o mahirap ay nakikinabang,” paliwanag ni Bascon.
Ipinaalala rin nito sa mga dumalo na sa Abril 15, 2016 na ang deadline sa pagbabayad ng buwis.
Batay sa datos, simula 2012 hanggang 2015 ay tumaas ang tax collection ng BIR sa Romblon kung saan umangat ito sa 18.35 porsiyento.
Ngayong 2016 ay puntirya ng ahensiya na makalikom ng humigit kumulang PhP 449,702,000 base na rin sa kanilang monthly target sapagkat noong Enero ay nakakolekta sila ng halagang PhP35.7 milyon at pagsapit ng buwan ng Pebrero naman ay PhP 28.835 milyon na katumbas na pagtaas ng 40 porsiyento ngunit kapos pa rin ito ng 2 porsiyento base sa kanilang target.
“We want to propel the nation to greater heights,” pahayag ni RDO Bascon.
