by Paul Jaysent Fos, Romblon News | Sunday, 21 February 2016
Dead on arrival sa Romblon Provincial Hospital ang isang babae matapos mahulog sa bangin sa Sitio Hacienda, Barangay Progreso Weste sa bayan ng Odiongan ang sinasakyan nitong motorsiklo pasado alas-11 ngayong gabi.
Ayon sa nakaligtas na driver ng motorsiklo na may plate number na 3774 VK, galing umano sila sa isang resort sa bayan ng Looc at namasyal sa replica ng sikat na Eiffel Tower at pauwi na sana ng Odiongan nang mahulog sa bangin.
Tumama umano sa kahoy ang ulo ni Rose Galindez, residente ng Barangay Canduyong sa Odiongan, na naging sanhi ng kanyang agad na pagkamatay habang nagtamo naman ng sugat sa ulo at katawan ang driver na nakilalang si Gerald Fabon, residente ng Barangay Budiong sa parehong bayan.
Ayon naman sa isa sa mga kagawad na tumulong na madala ang mga biktima sa hospital, masyado talaga umanong madilim sa lugar kapag gabi at delikado sa mga riders lalo na kung mahina ang ilaw ng sasakyan.
Iniimbestigahan na ng Odiongan Municipal Police Station ang aksidente, at maaari umanong nakainom ang driver ng motorsiklo kung kaya't nahulog sa bangin.
