by Paul Jaysent Fos, Romblon News | Friday, 12 February 2016
Nadakip ng mga tauhan ng PNP-CIDG4B sa pakikipagtulungan ng mga tauhan ng Municipal Police Station ng Odiongan, Ferrol at Calatrava ang most wanted person ng Malabon City sa bayan ng Odiongan sa Romblon nitong Biyernes ng hapon.
Nakilala ang suspek na si Renante Egioma, 34 taong gulang, kapatid ito nina Jessie at Jeffrey Egioma na nadakip ng PNP-CIDG sa ginawang raid noong Miyerkules sa Sitio 6, Samapil, Catmon, Malabon City.
Nadakip si Renante Egioma sa bahay ng kanyang live-in partner sa Romblon, sa bisa ng isang warrant of arrest sa kasong murder.
Si Renante Egioma ay miyembro umano ng gun for hire group na ‘Avatar Group’, at sangkot sa robbery-holdup crimes sa Metro Manila.
Suspek si Egioma sa pagpatay sa miyembro ng Philippine practical shooting team na si Michael Lontoc noong September 25, 2011.
Kasalukuyang nakapiit si Egioma sa Odiongan Municipal Police Station at inaasahang dadalhin sa Mandaluyong sa mga susunod na araw upang iharap sa korte.
