Photo for illustration only. Source: http://www.insidethegames.biz
Sobrang tagal na ang panahong lumipas, simula nang ako'y ipanganak ng aking mga magulang hanggang sa ngayon, may isang bagay pa sa buong lalawigan ng Romblon na hindi ko nakikita. Ito'y ang isang malaki o kahit sabihin natin na katamtamang laki na Multipurpose Sports Complex. Bagamat marami na ring mga naging kilala na mga personalidad sa larangan ng palakasan tulad halimbawa ni Elma Moros, Darry Foja, at iba pa. Subalit, tila baga napag-iwanan ang mga proyektong inprastrakturang pang-palakasan. Bakit nga ba?
Sa bayan ng Odiongan halimbawa, meron namang malaking area kung tutuusin na pwedeng pagtayuan ng sports complex o arena, halimbawa ay pagsamahin ang playgrounds ng RNHS at ang Odiongan South Central Elementary School.
Walang budget? Ako'y naniniwala na talagang malaking budget ang kakainin ng isang maganda at malaking sports complex, pero wala na ba talagang paraan para mapundohan ito?
Sino ang maglalaan ng pundo? Ang congressman ba? Ang Provincial Government ba, o sa pamamagitan ng pinagsama-samang kontribusyon ng mga nakakasakop o makikinabang na mga munisipyo?
Hindi ba maaari na ilapit sa mga senador o iba pang congressmen sa MIMAROPA? o ibang mga pilantropong mga kongresista o businessman?
Kung si Congressman Manny Pacquiao lang ay magbibigay na ng pondo sa ngayon para sa pagpapatayo ng magarang sports complex sa probinsya ng Romblon, let's say sa Odiongan, kasi may pwedeng magamit na malapad na lote na nasa sentro lang, kahit pa pangalanan ang sports complex na ito na ‘Manny Pacquiao Sports Complex', ay ibibigay ko ang aking boto para sa kanya bilang senador, at maaaring ikampanya ko pa.
Hindi ko kinakampanya si Congressman Pacquiao kundi gusto ko lang ipahiwatig na, meron tayong mga government officials sa lalawigan na maaaring may paraang gawin upang maisakatuparan ang ganitong proyekto. Para sa akin ay ‘behind' ang Romblon sa mga pasilidad na pang-palakasan.
Mabuti nga noong kabataan pa namin, kahit papaano may napagtatyagaan na kung tawagin ay Boy Scout Building, na ginawang youth community center kung saan pwedeng maglaro ng mga indoor games tulad ng table tennis, badminton, boardgames at may mga musical instruments pa. Sa aking pagkakatanda, pinangunahan ito at pinamahalaan ng ating kaibigan na si Vic Musa.
Pakiusap lang sa mga kumankandidato ngayon, mula congressman pababa sa mga munisipyo, pakisama po naman ang major sports infrastructure project sa inyong mga nakikinita na mga programang ipapatupad kapag kayo ay nahalal.
