Parang kaylan lang ang Enero 2015 at ngayong araw nga ay panibagong taon na naman. Totoong napakabilis umusad ang araw.
Sa pagsapit ng bagong taon ay maraming mga paniniwala tayong mga namana pa mula sa ating mga ninuno at impluwensiya ng ibang lahi, tulad na lamang ng mga paniniwala sa punsoy. Popular dito ang pagkakaroon o paghahain ng mga bilog na prutas sa pagsapit ng bagong taon, sa paniniwala na maghahatid ito ng ‘swerte' sa loob ng panibagong taon.
Ako naman po ay nagrerespeto sa paniniwala ng iba. Ganun pa man, nais ko rin pong sabihin na ang totoong pag-asa ay nagmumula lamang sa ating kataas-taasang Diyos. Anumang bilog na hain sa bagong taon, lahat po ito ay mga pagkain lamang – kakainin at idudumi kinabukasan.
Ang pinaka magadang hain sa bagong taon ay ang sama-samang pagdarasal ng pamilya sa ating Maylikha upang hilingin ang patuloy na biyaya at gabay para sa panibagong taon. Papurihan ang Panginoon sa lahat ng mga nangyari sa buhay sa nakalipas na taon. Ipagpatuloy ang mga mabubuting gawa, at talikdan ang mga masasama para sa tunay at makabuluhang pagbabago sa panibagong taon. Anumang mga hindi magandang nangyari ay ibaon na lang sa limot subalit kapulutan ito ng aral.
Kami po sa Romblon News Network ay bumabati sa inyong lahat ng isang masaganang bagong taon 2016.
