by Paul Jaysent Fos, Romblon News | Sunday, 04 October 2015
(UPDTED: October 05, 2015 | 1:13 AM) Pinaghahanap na umano ng mga tauhan ng Alcantara Municipal Police Office ang tatlong lalake na maaring suspek sa pagpatay kay Ofelia at Felix Baraca, ang mag-asawang natagpuang patay at may laslas sa leeg sa labas ng kanilang bahay sa Barangay Camili sa Alcantara nitong Huwebes ng gabi.
Ang mga nasabing suspek umano ang maaring sangkot sa pagnanakaw at pagpatay sa dalawa ayon sa pulisya.
Ayon kay Jerry Baraca, anak ng mga biktima, may nangyari na umanong nakawan nitong nakaraan mga buwan sa bahay ng kanyang mga magulang na kinasasangkutan ng isang Jay-R Gallos, 19 taong gulang at nakatira halos 200 metro lang ang layo sa pinangyarihan ng krimen.
Pero nang puntahan ng mga awtoridad nitong October 03 ang bahay ng nasabing lalake, wala umano ito roon at di umanoy nakatira na ito sa kanyang tiyahin sa Barangay Bagsik sa parehong bayan. Ngunit ng beripikahin ng awtoridad sa kanyang tiyahin, sinabi nitong pumunta umano si Jay-R kasama si Christian Rose, 20 taong gulang, at si Marvin Rose, 23 taong gulang kay Jerry Rose, uncle ni Jay-R noong September 27 sa Sitio Cabugao sa Barangay Punta sa kalapit na bayan ng Looc para mag-ani ng palay.
Ngunit ayon ky Jerry Rose, hindi umano pumunta ang tatlo sa kanya o nagpakita man lang.
Isang impormante naman ang nagsabi na nitong September 29, pasado alas-4 nang hapon ay nakita ang tatlo na bumibili ng alak sa isang tindahan sa Barangay Bagsik. Sinabi rin ng impormante na ang tatlo ay nag-uuling sa Sitio Sibukaw, Barangay, Camili sa Alcantara kung saan malapit lang sa pinangyarihan ng krimen.
Sa panayam ng Romblon News kay PO2 Aries Miñano ngayong araw, sinabi niyang hindi na malaman ang lokasyon ng tatlong suspek na ngayo'y pinaghahanap na ng pulisya.
Sinabi rin ni Miñano na pinaghahanap na ng mga awtoridad ang tatlo na kung saan itinuturing nang person of interest at sa maaring pag-kasangkot nang tatlo sa krimen.
