by Paul Jaysent Fos, Romblon News | Sunday, 04 October 2015
Maaring pagnanakaw umano ang dahilan kung bakit pinatay ang mag-asawang Felix Baraca, 64 years old, at Ofelia Baraca, 79 years old sa Barangay Camili, Alcantara, Romblon.
Natagpuan ang katawan ng mga biktima nitong huwebes ng gabi na naagnas na at may laslas sa leeg.
Ayon kay PO2 Aries Miñano ng Alcantara Municipal Police Station, nawawala umano ang ilang alagang manok, bigas, at kaunting halaga ng pera nang mag-asawa ng kanilang imbestigahan. Maari rin umanong kilala nila ang mga suspek kaya pinatay sila, dagdag pa ni PO2 Miñano.
Hindi naman matanggap ng pamilya ng nag-iisang anak ng mag-asawa ang nangyari sa dalawa.
Ayon sa manugang ng biktima, wala umanong kaaway ang mag-asawa at napakabait umano ito.
“Mabait yun talaga, masipag pa… Ngayon wala nang aani ng mga palay, sipag-sipag talaga nun.”, pahayag ng manugang.
Ayon naman sa Alcantara MPS, meron na silang lead kung sino ang maaring mga suspek at iniimbestigahan na ang mga ito sa ngayon.
