by Paul Jaysent Fos, Romblon News | Saturday, 10 October 2015
Nadakip sa Pampanga ng mga tauhan ng Alcantara Municipal Police Station sa pakikipagtulungan ng Alcantara Local Government Unit ang mga suspek sa pagpatay sa mag-asawang Felix at Ofelia Baraca ng Alcantara, Romblon.
Ayon kay Police Supt. Juan Anonuevo, Romblon Provincial Police Office Director, nadakip sa isinagawang follow up operation ang tatlong suspek na kinilalang sina Abelino Gallos, 19 taong gulang; Christian Mingo, 22 taong gulang; at Marven Rose, 25 taong gulang sa Vizal, Candaba, Pampanga kahapon.
Ang mga nasabing suspek ay kapitbahay ng mga biktima sa Barangay Bagsik sa Alcantara, Romblon.
Naaristo ang mga suspek matapos sabihin ng kamag-anak ng tatlo sa otoridad na gusto na nilang sumuko.
Matatandaang nitong September 29 nang matagpuang patay at may laslas sa leeg ang mag-asawang Baraca sa labas nang kanilang bahay.
Sinabi rin ng Alcantara MPS na may nawawalang mga manok, bigas at pera ang mag-asawa ng matagpuan.
Ayon pa kay Police Supt. Anonuevo, ibabyahe na sila patungong Romblon at nakatakdang sampahan ng kasong double murder sa Prosecutors Office sa Romblon.
