by Harl Fontamillas, Romblon News | Monday, 26 October 2015
Photo Courtesy: Reina Mae Largueza
Patuloy na pinaghahanap ng mga tauhan ng Santa Maria Municipal Police Station ang isang Vladimer Paulino matapos ituring na suspek sa pagtaga kay Dante Tapao Lorena, 31 years old at residente ng Sitio Cameranan, Barangay Sto Nino, ng bayan ng Santa Maria.
Ayon sa Spot Report na inilabas ng Santa Maria MPS para sa Romblon News, pasado alas-5 ng hapon ng Sabado, October 24, nang sumugod sa opisina ng kapulisan ang asawa ni Dante upang isumbong ang nangyaring pananaga sa kanyang asawa.
Ayon sa kanya, habang nanglalakad umano sila kasama ang kanilang mga anak sa Barangay Road ng nasabing Barangay patungo sana ng Sitio Ilaya nang walang kaano-anoy sinugod ang kanyang asawa ni Paulino at tinaga ito sa ulo gamit ang isang itak ng walang rason.
Agad na isinugod ang biktima sa Don Modesto Formilleza Sr. Memorial Hospital sa bayan ng Looc upang gamutin.
Batay naman sa ilang nakausap ng Romblon News sa lugar na pinangyarihan ng krimen, maaring lasing umano si Paulino noong mga oras na iyon.
Ayon sa huling report ng Santa Maria MPS, ligtas na ang biktima na nagtamo ng sugat sa bahaging likuran ng kanyang ulo.
