Sinimulan na ng Saint Vincent Cooperative ang pagtatayo ng St. Vincent Co-op Commercial Center sa Barangay Dapawan, Odiongan, Romblon kasunod ng isinagawang groundbreaking ceremony bilang bahagi ng pagdiriwang ng Cooperative Month ngayong Oktubre.
Ayon kay Jenebeth Conanan, chief executive officer ng Saint Vincent Cooperative, noong 2023 pa sinimulan ang pagpaplano para sa proyekto na dumaan sa mga general assembly meeting upang maipresenta at maaprubahan ng mga miyembro.
Layunin ng proyekto na palawakin ang mga serbisyo at oportunidad sa negosyo ng kooperatiba.
Makikipagtulungan sa pagtatayo ng gusali ang Yanneyes Builders Inc. at Blessed Hardware bilang mga contractor ng proyekto.
Inaasahang magkakaroon sa commercial center ng Baymart Tablas at iba pang commercial spaces na maaaring paglagyan ng mga negosyo.
Bahagi ang proyekto ng pagpapalawak ng mga gawaing pangkabuhayan ng Saint Vincent Cooperative at paglikha ng karagdagang oportunidad sa negosyo sa lugar.
