Nagpaabot ng pasasalamat ang Lokal na Pamahalaan ng Ferrol sa mga proyektong ipinagkaloob sa bayan sa ilalim ng Local Government Support Fund (LGSF) ng administrasyon ni Pangulong Ferdinand R. Marcos Jr., na nakatuon sa pagtugon sa mga pangunahing pangangailangan ng mga lokal na pamahalaan at komunidad.
Ayon kay Ferrol Mayor Christian Gervacio, kabilang sa mga kasalukuyang isinasagawang proyekto ang ₱23 milyon na access road sa Sitio Landing, Barangay Tubigon, na bahagi ng 2026 LGSF.
May haba itong humigit-kumulang isang kilometro at matagal na umanong hinihiling ng mga residente sa lugar upang mapabuti ang kanilang access at pagbiyahe.
Sa ilalim naman ng 2025 LGSF, inilaan ang ₱3,213,600 para sa pagtatayo ng mga school clinic sa Ferrol Central Elementary School at Bunsoran Elementary School.
May mga access road project din sa Barangay CM Recto at Hinag-oman, na kapwa may pondong ₱3,900,169.
Kasalukuyang isinasagawa ang konstruksyon ng lahat ng nabanggit na proyekto.
Ang LGSF ay pondong inilaan ng national government para suportahan ang mga proyekto at programa ng mga lokal na pamahalaan, partikular sa mga imprastraktura at iba pang serbisyong tumutugon sa pangangailangan ng mga komunidad.
Bukod sa mga imprastraktura, sinabi rin ni Gervacio na bahagi ng LGSF ang ₱7 milyon na pondong ginamit ng LGU Ferrol para sa pamamahagi ng bigas sa kanilang mga residente.
Sa pamamagitan ng mga proyekto at programang pinopondohan sa ilalim ng LGSF, inaasahang patuloy na mapapabuti ang mga pasilidad, konektibidad at serbisyong natatanggap ng mga residente ng Ferrol.
Discussion about this post