Nagsimula ng dagsain nitong weekend ang kilalang Bonbon Beach sa bayan ng Romblon, Romblon kung saan makikita ang white beach at sandbar na ipinagmamalaki ng kapitolyo ng lalawigan.
Ayon sa ilang turista na nakausap ng Romblon News Network, alternatibong destinasyon nila ngayon ang Romblon habang sarado ang isla ng Boracay.
Sinabi naman ng lokal na pamahalaan ng Romblon na dumami ang turistang bumibista sa probinsya ngayon taon at inaasahang mas dadami ito lalo pa ngayong sarado na anim na buwan ang Boracay.
Para paghandaan ang pagdami ng mga turista, naglagay na ang lokal na pamahalaan ng mga taong magpupulot ng basura sa sikat na Bonbon Beach at magpapanatili sa ganda nito.
Siniguro naman ng lokal na pamahalaan na kanilang babantayan ang mga estrukturang maaaring itayo malapit sa mga beach sa lalawigan para matiyak na tama ang distansiya nito at hindi matulad sa Boracay.
Sa sandbar ng Bon Bon beach, maaaring makatawid sa kabilang isla ang mga tao kapag low tide, kaya mahalagang malaman kung kailan ang high tide at low tide.
