Pinasinayaan ni Pangulong Ferdinand R. Marcos Jr. nitong Huwebes ang Ibato-Iraan Small Reservoir Irrigation Project (SRIP) sa Aborlan, Palawan, na inaasahang magbibigay ng tuloy-tuloy na suplay ng tubig sa mga sakahan at magpapalakas sa produksyon ng agrikultura sa lalawigan.
Ang proyekto, na ipinatupad ng National Irrigation Administration (NIA), ang pinakamalaking irrigation project sa Palawan at kauna-unahang reservoir-type irrigation system sa isla.
Inaasahang makapagbibigay ito ng maaasahang suplay ng tubig sa buong taon para sa 1,072 ektarya ng sakahan at direktang makikinabang ang 425 magsasaka sa bayan ng Aborlan.
Sa kanyang talumpati, sinabi ni Pangulong Marcos na mahalaga ang pagpapalawak ng mga proyektong pang-irigasyon upang matugunan ang epekto ng tagtuyot, El Niño, at pabago-bagong kondisyon ng panahon sa sektor ng agrikultura.
“Sa panahon ngayon, lalo na sa gitna ng tagtuyot o El Niño, hindi na puwedeng umasa lang tayo sa pagdating ng ulan upang matubigan ang ating mga pananim,” ani ng Pangulo.
Binigyang-diin niya na ang pagbabago ng klima ay may direktang epekto sa ani, kita ng mga magsasaka, at seguridad sa pagkain ng bansa, kaya patuloy na namumuhunan ang pamahalaan sa mga modernong irrigation project.
Ayon sa Pangulo, bukod sa pagpapalawak ng irigasyon, naglalagay rin ang pamahalaan ng solar-powered irrigation pumps na may artificial intelligence satellite-assisted monitoring at fertigation systems sa Palawan upang mas maging episyente ang paggamit ng tubig at pataba at mapataas ang produktibidad ng mga sakahan.
Hinimok din ni Marcos ang NIA at ang Ibato-Iraan Farmers Irrigators Association, Inc. na pangalagaan at panatilihin ang bagong pasilidad upang matiyak ang pangmatagalang pakinabang nito sa mga magsasaka.
Muling tiniyak ng Pangulo ang patuloy na suporta ng pamahalaan sa mga magsasaka sa pamamagitan ng modernisasyon ng mga irrigation system at iba pang programang magpapalakas sa produksyon ng pagkain at kabuhayan sa kanayunan.
