Pinalalakas ng mga ahensya ng pamahalaan, mga lokal na pamahalaan (LGUs), municipal health offices, at mga private pediatrician sa Romblon ang kanilang koordinasyon bilang paghahanda sa Measles-Rubella Supplemental Immunization Activity (MR-SIA), isang nationwide vaccination campaign na naglalayong mapataas ang immunization coverage at maprotektahan ang mga bata laban sa tigdas at rubella.
Pinangunahan ng Department of Health (DOH) Romblon Provincial Office at Provincial Health Office (PHO) ang planning at coordination meeting na dinaluhan ng mga municipal health officer, alkalde, private pediatrician, at mga kinatawan ng iba't ibang partner government agencies upang pag-isahin ang mga estratehiya at tiyakin ang maayos na pagpapatupad ng vaccination campaign sa buong lalawigan.
Tinalakay sa pulong ang pagpapalakas ng koordinasyon ng bawat ahensya at lokal na pamahalaan, gayundin ang pagtukoy sa kani-kanilang tungkulin upang matiyak na maaabot ng pagbabakuna ang lahat ng kwalipikadong bata, kabilang ang mga naninirahan sa mga geographically isolated at island communities.
Bilang bahagi ng paghahanda, gaganapin sa bayan ng Romblon ang MIMAROPA Regional Launching ng Measles-Rubella Supplemental Immunization Activity sa Agosto 5, bago ang pagsisimula ng regionwide rollout ng vaccination campaign.
Ayon kay Provincial DOH Officer Dr. Winston Palasi, mahalagang mapanatiling mataas ang antas ng pagbabakuna upang maprotektahan ang mga bata laban sa posibleng pagkalat ng tigdas.
Bagama't wala pang naitatalang kumpirmadong kaso ng tigdas sa Romblon mula noong 2022, sinabi ni Palasi na nananatiling mahalaga ang pagpapabakuna upang maiwasan ang posibleng pagbalik ng sakit.
Nangako naman ang mga municipal health office na pakikilusin ang mga barangay health worker upang paigtingin ang information campaign at hikayatin ang mga magulang na pabakunahan ang kanilang mga anak.
Nagpahayag din ng suporta ang mga private pediatrician sa pamamagitan ng pagpapalaganap ng tamang impormasyon tungkol sa kahalagahan ng bakuna at paghikayat sa mga magulang na makiisa sa supplemental immunization activity.
Batay sa datos na ipinakita sa pulong, patuloy ang pagtaas ng mga kaso ng tigdas sa MIMAROPA. Mula sa 1.94 measles incidence rate noong 2023, umakyat ito sa 4.28 noong 2024 at 6.64 noong 2025. Samantala, bumaba naman ang routine immunization coverage ng rehiyon mula 73.09 porsyento noong 2024 sa 59.97 porsyento noong 2025.
Ang MR-SIA ay bahagi ng patuloy na programa ng pambansang pamahalaan sa ilalim ng administrasyong Marcos upang maprotektahan ang mga bata laban sa measles at rubella at mapataas ang immunity ng mga maaaring hindi nabigyan ng regular na bakuna. Ayon sa DOH, nakasalalay ang tagumpay ng kampanya sa sama-samang pagtutulungan ng mga ahensya ng pamahalaan, mga lokal na pamahalaan, health workers, private medical practitioners, at iba pang katuwang sa komunidad upang maabot ang bawat kwalipikadong bata sa lalawigan.
Discussion about this post