Bumaba ng 48.63 porsyento ang naitalang focus crimes sa MIMAROPA sa unang dalawang buwan ng panunungkulan ni Police Regional Office (PRO)-MIMAROPA Regional Director PBGen. Christopher R. Dela Cruz, ayon sa pinakahuling datos ng pulisya.
Batay sa tala ng PRO MIMAROPA, bumaba sa 94 kaso ang focus crimes mula 183 kaso sa kaparehong panahon noong nakaraang taon, o mula May 8 hanggang July 7. Si Dela Cruz ay nanungkulan bilang regional director noong May 8.
Kabilang sa mga kasong nakapagtala ng pagbaba ang murder, homicide, physical injury, rape, robbery, theft, carnapping, at motornapping.
Bukod dito, iniulat din ng PRO MIMAROPA ang 11.02 porsyentong pagbaba sa kabuuang bilang ng mga krimen, mula 944 kaso noong nakaraang taon sa 840 kaso ngayong taon.
Bumaba rin ng 24.68 porsyento ang mga Peace and Order Indicator (POI) crimes, mula 624 tungo sa 470 kaso.
Pinakamalaki ang ibinaba sa mga kaso ng physical injury (65.22%), theft (52.27%), rape (50.91%), at murder (33.33%). Naitala rin ang pagbaba ng mga kaso ng robbery at motornapping.
Ayon kay Dela Cruz, bunga ang pagbaba ng krimen ng pinaigting na pagpapatupad ng Framework for Integrated Government of Humanitarian Assistance and Tackling of Crimes (F.I.G.H.T. C.R.I.M.E.S.) at ng Deployment and Location Cross Innovation (DLX) strategy, na naglalayong itugma ang deployment ng mga pulis sa crime trends at pangangailangan ng bawat komunidad.
“Behind every decrease in crime is a family that was spared from becoming a victim. These figures represent safer neighborhoods, stronger public confidence, and the collective efforts of our police officers, local government units, barangay officials, force multipliers, and community partners,” ani Dela Cruz.
Dagdag pa niya, nakatuon ang PRO MIMAROPA hindi lamang sa pagpapababa ng crime statistics kundi sa pagpapanatili ng kapayapaan at kaayusan sa buong rehiyon sa pamamagitan ng patuloy na pakikipagtulungan sa mga lokal na pamahalaan at komunidad.
