Kasunod ng mga naiulat na sightings ng cobra sa ilang lugar sa lalawigan, pinapayuhan ng mga awtoridad ang publiko na maging maingat at alamin ang wastong hakbang sakaling makagat ng makamandag na ahas.
Sa nakaraang Provincial Peace and Order Council (PPOC) meeting, sinabi ni Governor Trina Firmalo-Fabic na mayroon nang nakahandang anti-venom sa Romblon Provincial Hospital sa Tablas at Romblon District Hospital sa isla ng Romblon upang agad na matugunan ang mga posibleng kaso ng kagat ng cobra at iba pang makamandag na ahas.
Ayon sa mga eksperto sa kalusugan, mahalagang manatiling kalmado ang biktima at agad na humingi ng medikal na atensyon. Ang sobrang paggalaw ng katawan ay maaaring magpabilis sa pagkalat ng lason kaya't inirerekomenda na limitahan ang pagkilos ng nakagat na bahagi habang hinihintay ang transportasyon patungo sa pinakamalapit na ospital.
Pinapayuhan din ang biktima na alisin ang mga singsing, relo, o iba pang masisikip na bagay sa apektadong bahagi ng katawan dahil maaaring mamaga ito habang lumalala ang epekto ng lason.
Mahigpit namang ipinagbabawal ng mga eksperto ang ilang nakaugaliang pamamaraan tulad ng pagsipsip ng lason gamit ang bibig, paghiwa sa sugat, paglalagay ng mga herbal na gamot o kemikal, at paggamit ng tourniquet o mahigpit na tali sa nakagat na bahagi. Ayon sa mga health professional, maaari lamang nitong mapalala ang kondisyon ng biktima at magdulot ng karagdagang pinsala.
Binigyang-diin din ng mga eksperto na kahit maliit lamang ang marka ng kagat, mahalagang magpatingin agad sa doktor dahil maaaring lumabas ang mga sintomas ng pagkalason pagkalipas ng ilang minuto o oras matapos ang insidente.
Samantala, hinihikayat ang publiko na agad ipagbigay-alam sa kanilang barangay o sa mga kinauukulang awtoridad kung may makitang cobra o iba pang makamandag na ahas sa kanilang lugar upang maiwasan ang posibleng panganib sa komunidad.
Paalala ng mga awtoridad, ang agarang pagdadala sa pagamutan at tamang medikal na lunas ang pinakamahalagang hakbang upang mapataas ang tsansa ng paggaling ng isang biktima ng kagat ng cobra.
Discussion about this post