Gagamitin ng Pamahalaang Panlalawigan ng Romblon ang P46 milyong pondo mula sa Local Government Support Fund (LGSF) para sa pagsasaayos ng isang provincial road sa Barangay Comod-om, Alcantara.
Ayon kay Governor Trina Alejandra Firmalo-Fabic, napagpasyahan ng pamahalaang panlalawigan na ituon ang buong pondo sa isang pangunahing proyekto sa halip na hatiin ito sa ilang maliliit na proyekto.
Ang pondong inilaan para sa imprastraktura ay bahagi ng kabuuang P92 milyong LGSF allocation na natanggap ng lalawigan mula sa pambansang pamahalaan.
Sinabi ni Fabic na kabilang sa prayoridad ng lalawigan ang pagpapakongkreto ng kalsadang nag-uugnay sa Barangay Comod-om at Aglicay dahil sa kahalagahan nito sa mga residente at motorista mula sa Alcantara at karatig na bayan ng Santa Fe.
Batay sa provincial road inventory, kabilang ang naturang kalsada sa mga proyektong nangangailangan ng agarang pagpapabuti.
Tinatayang aabot sa P100 milyon hanggang P150 milyon ang kabuuang halaga ng proyekto.
Upang makatulong sa pagpopondo, naglaan din ang Lokal na Pamahalaan ng Alcantara ng P25 milyong counterpart fund para sa proyekto.
Sa kabuuan, aabot sa P71 milyon ang paunang pondong magagamit para sa pagsisimula ng road improvement project mula sa kontribusyon ng pamahalaang panlalawigan at lokal na pamahalaan ng Alcantara.
Ang Local Government Support Fund ay isa sa mga programa ng pambansang pamahalaan na nagbibigay ng pondo sa mga lokal na pamahalaan para sa pagpapatupad ng mga prayoridad na proyekto at programang pangkaunlaran.
Discussion about this post