Umabot sa ₱1.94 milyon na halaga ng livelihood support ang ipinagkaloob ng Department of Agriculture–Special Area for Agricultural Development (SAAD) MIMAROPA sa dalawang samahan ng magsasaka sa bayan ng Santa Maria noong Abril 15.
Kabilang sa mga benepisyaryo ang Bonga Farmers and Fisherfolks Association (FFA), na nakatuon sa root crops production, at Concepcion Sur Farmers and Fisherfolks Association, na may proyektong broiler chicken raising.
Tumanggap ang Bonga FFA ng tiller cultivator, mga pananim tulad ng peanut, ube, at ginger, pati na digital hanging scale. Samantala, pinagkalooban naman ang Concepcion Sur FFA ng poultry house, tri-wheel hauling vehicle, broiler chicks, rechargeable solar lights, at ice box cooler.
Dumalo sa turnover ceremony sina Santa Maria Mayor Lorilie M. Fabon, Provincial Agriculturist Relly Diokno, kinatawan ng gobernador na si Jun Fiedacan, Municipal Agriculturist Engr. Ramel L. Fabon, at APCO Romblon Engr. Analiza A. Escarilla.
Ayon kay DA-SAAD MIMAROPA Food Production and Livelihood Cluster Lead Engr. Maiden Marie M. Segui, layunin ng tulong na mapataas ang produksyon ng mga magsasaka at masuportahan ang kanilang pang-araw-araw na pangangailangan.
“Ang gusto po natin, ‘yong produksyon po ninyo ay mapataas po natin, matustusan ang inyong araw-araw na pamumuhay, mapataas ang food production, at magkaroon kayo ng livelihood,” ani Segui.
Ibinahagi naman ni Rogel Moreno, pangulo ng Bonga FFA, na malaking tulong ang natanggap na suporta upang mabawasan ang kanilang gastusin sa produksyon.
“Maraming-maraming salamat po sa lahat ng interventions na ibinigay ni SAAD. Hindi na kami bibili ng pantanim,” aniya.
Samantala, nagpahayag din ng suporta ang lokal na pamahalaan ng Santa Maria sa programa, na naglalayong paunlarin ang mga samahan ng magsasaka bilang community-based enterprises.
Bukod sa dalawang asosasyon, may apat pang farmer groups sa bayan ang nakikinabang sa ilalim ng SAAD program sa pamamagitan ng mga proyekto sa crops, livestock, at poultry.
