Kumpleto na ang listahan ng mga bansang lalahok sa FIFA World Cup 2026 matapos ang serye ng qualifying tournaments sa iba’t ibang kontinente. Ang torneo ay gaganapin mula Hunyo 11 hanggang Hulyo 19, 2026 sa mga bansang United States, Canada, at Mexico.
Sa kauna-unahang pagkakataon, pinalawak ng FIFA ang torneo mula 32 patungong 48 koponan, na nagbibigay ng mas maraming oportunidad sa iba’t ibang bansa na makasali sa pinakamalaking torneo ng football na ginaganap kada apat na taon.
Sa inilabas na groupings, kabilang sa Group A ang Mexico, South Africa, South Korea at Czech Republic; sa Group B ang Canada, Bosnia and Herzegovina, Qatar at Switzerland; sa Group C ang Brazil, Morocco, Haiti at Scotland; at sa Group D ang United States, Turkey, Paraguay at Australia.
Nasa Group E naman ang Germany, Ivory Coast, Ecuador at Curacao; Group F ang Japan, Netherlands, Tunisia at Sweden; Group G ang New Zealand, Iran, Belgium at Egypt; at Group H ang Spain, Uruguay, Saudi Arabia at Cape Verde.
Samantala, nasa Group I ang France, Senegal, Norway at Iraq; Group J ang Argentina, Algeria, Austria at Jordan; Group K ang Portugal, DR Congo, Uzbekistan at Colombia; at Group L ang England, Ghana, Croatia at Panama.
Sa bagong format, maglalaban-laban muna ang bawat koponan sa kanilang grupo kung saan ang top dalawang koponan sa bawat grupo ay awtomatikong aabante sa Round of 32. Makakasama nila ang walong pinakamahusay na third-placed teams, bago tuluyang magtuloy sa knockout stage hanggang finals.
Papaloob sa torneo bilang defending champion ang Argentina, na may tatlong World Cup titles sa kasaysayan. Samantala, nananatiling hawak ng Brazil ang rekord bilang bansang may pinakamaraming kampeonato sa World Cup na may lima.
Inaasahang magiging mas kompetitibo at mas malawak ang representasyon ng iba’t ibang kontinente sa World Cup 2026, kasabay ng layunin ng FIFA na palawakin ang global reach ng football.
Discussion about this post