Nagwagi sa katatapos lamang na Australian Open 2026 sina Carlos Alcaraz ng Spain sa men’s division at Elena Rybakina ng Kazakhstan sa women’s division. Ang Australian Open ang unang Grand Slam tournament ng taon na ginanap sa Melbourne Park sa Melbourne, Australia mula Enero 12 hanggang Pebrero 1, 2026, at nilaro sa hard court surface.
Nakuha ng 26-anyos na si Rybakina ang kampeonato matapos talunin ang kasalukuyang women’s world No. 1 na si Aryna Sabalenka sa tatlong set, 6–4, 4–6, 6–4. Ito ang ikalawang Grand Slam title ni Rybakina sa kanyang karera, matapos ang una niyang tagumpay sa Wimbledon noong 2022.
Bago makarating sa finals, tinalo ni Rybakina si Kaja Juvan ng Slovenia sa first round, 6–4, 6–3; si Varvara Gracheva ng France sa second round, 7–5, 6–2; si Tereza Valentova ng Czech Republic sa third round, 6–2, 6–3; si Elise Mertens ng Belgium sa fourth round, 6–1, 6–3; si Iga Swiatek ng Poland sa quarterfinals, 7–5, 6–1; at si Jessica Pegula ng United States sa semifinals, 6–3, 7–6.
Sa men’s division, nagkampeon si Carlos Alcaraz matapos talunin ang 38-anyos na si Novak Djokovic ng Serbia sa finals sa iskor na 2–6, 6–2, 6–3, 7–5. Sa panalong ito, nakumpleto ni Alcaraz ang apat na Grand Slam titles sa kanyang karera—ang Australian Open, French Open, Wimbledon, at US Open—sa edad na 22.
Bago ang finals, tinalo ni Alcaraz si Adam Walton ng Australia sa first round, 6–3, 7–6, 6–2; si Yannick Hanfmann ng Germany sa second round, 7–6, 6–3, 6–2; si Corentin Moutet ng France sa third round, 6–2, 6–4, 6–1; si Tommy Paul ng United States sa fourth round, 7–6, 6–4, 7–5; si Alex de Minaur ng Australia sa quarterfinals, 7–5, 6–2, 6–1; at si Alexander Zverev ng Germany sa semifinals, 6–4, 7–6, 6–7, 6–7, 7–5.
Nanatili rin si Alcaraz sa puwesto bilang world No. 1 matapos ang torneo.
Sa iba pang kategorya, nagkampeon sa men’s doubles ang tambalan nina Neal Skupski ng United Kingdom at Christian Harrison ng United States. Sa women’s doubles, nagwagi sina Elise Mertens ng Belgium at Zhang Shuai ng China, habang sa mixed doubles ay nagkampeon ang Australian pair na sina John Peers at Olivia Gadecki.
