Ipinakita ng Pilipinas ang yaman ng mga dive sites nito kabilang ang sa Romblon sa ginanap na Diving Resort and Travel (DRT) Expo sa China National Convention Center noong Agosto 8 hanggang 10, kung saan muling pinagtibay ang katayuan ng bansa bilang isa sa top global diving hubs.
Pinangunahan ng Philippine Department of Tourism office sa Beijing at ng Tourism Promotions Board ang partisipasyon ng bansa, tampok ang mga world-class marine attractions mula sa iba’t ibang rehiyon, kabilang ang mga umuusbong na diving destinations sa Romblon, Ticao Island sa Masbate, at Camiguin.
Nakamit ng Pilipinas ang Island Charm Award, pagkilala sa kakaibang appeal ng bansa sa mga turista. Noong nakaraang taon, iginawad din sa bansa ang Best Diving Destination Award sa kaparehong expo.
Ayon kay Philippine Ambassador to China Jaime FlorCruz, ipinakita ng presensiya ng Pilipinas sa expo ang commitment ng bansa na isulong ang turismo at pangalagaan ang likas na yaman sa ilalim ng adbokasiyang sustainable tourism.
“China is currently the world’s fastest-growing dive market,” ayon sa industry reports, na nagsabing tumataas ng 35 hanggang 40 porsyento taun-taon ang bilang ng mga bagong certified divers. Dahil dito, lalong nagiging kaakit-akit ang marine biodiversity ng Pilipinas para sa mga Chinese divers.
Ang DRT Expo ay tinuturing na pinakamalaking international dive exhibition sa Asya, na taunang isinasagawa sa mga pangunahing lungsod gaya ng Hong Kong, Shanghai, at Taipei. Nakatakdang mag-host ang Maynila ng susunod na leg ng expo ngayong Setyembre.
