Buong suporta ang ipinahayag ni Mayor Aaron James Madrona ng San Agustin, Romblon sa kautusan ng Department of the Interior and Local Government (DILG) na nagbabawal sa lahat ng kawani at opisyal ng pamahalaan na makisali sa online gambling o anumang uri ng sugal gamit ang makabagong teknolohiya tulad ng cellphone at computer.
Ayon sa alkalde, mahalagang hakbang ang pagbabawal na ito upang maiwasan ang pagdami ng mga kawani at opisyales ng gobyerno na nalululong sa online gambling, na maaaring magdulot ng kapabayaan at pagbaba ng produktibidad sa pagtupad ng kanilang mga tungkulin.
“Public office is a public trust. Sa bayan ng San Agustin, ipinatutupad namin ang serbisyong matapat, mapagpakumbaba, at may integridad,” pahayag ng alkalde.
Dagdag pa niya, bilang isang batang lingkod-bayan, nais niyang maging huwaran para sa kabataan at isabuhay ang kasabihan ni Gat Jose Rizal na “Ang kabataan ay pag-asa ng bayan.”
Ang nasabing memorandum ng DILG ay sumasaklaw sa lahat ng kawani ng ahensya, kabilang ang mga elected at appointed officials ng mga lokal na pamahalaan, at layong mapanatili ang kredibilidad ng serbisyo publiko.
