Opisyal nang ipinroklama ng Provincial Board of Canvassers si Trina Firmalo-Fabic bilang nanalong kandidato sa pagka-gobernador ng Romblon matapos ang pormal na pagbibilang ng mga boto sa lalawigan.
Si Fabic ang kauna-unahang babaeng magiging gobernador ng lalawigan ng Romblon.
Sa kaniyang maikling talumpati matapos ang proklamasyon, ipinaabot ni Fabic ang kaniyang taos-pusong pasasalamat sa mga bumoto sa kaniya.
“Rest assured that we want to show the people of Romblon, what it truly means to have good service from our government,” aniya.
Sinabi rin niya na dapat nang isantabi ang politika dahil ito ay nakasisira sa mga magagandang hangarin para sa lahat.
“At the end of the day, we are all Romblomanons, we are all from the same province, we have the same blood beating from our veins,” dagdag pa niya.
Naiproklama na rin bilang mga nanalong kandidato sa katatapos na halalan sa probinsya ng Romblon sina Ricmel Falqueza ng Second District at Cary Falculan ng First District para sa Sangguniang Panlalawigan.
Bagama’t hindi dumalo sa proclamation ceremony, idineklara na rin ng Provincial Board of Canvassers si Eleandro Madrona bilang nanalong congressman at si Armando Gutierrez bilang bise gobernador ng Romblon. Para sa Sangguniang Panlalawigan, idineklarang panalo sa first district sina Aaronn Riano, Maria Rhosarean Solis, Herminio Mortel, at Abner Perez, habang sa second district naman ay sina Irene Morgado, Rubelyn Solis, Venizar Maravilla, at Natalio F. Beltran, III.
