Ilang residente ng bayan ng San Andres, Romblon ang gumamit ng social media upang manawagan at magtanong kung bakit madalas silang nakakaramdam ng mahinang pag galaw ng lupa sa kanilang lugar.
Nitong Setyembre bago tumama ang magnitude 4.1 na lindol sa Santa Maria, Romblon sunod sunod umano silang nakaramdam ng pagyanig ng lupa at pinagtataka nila kung bakit hindi naman nararamdaman sa ibang bayan ang nasabing pagyanig.
Ayon kay Jabez Gadon ng Municipal Disaster Risk Reduction and Management Office, ipinaabot na nila ito noong Setyembre sa Office of the Civil Defense MIMAROPA upang tingnan kung ano ang maaring dahilan ng mga pagyanig.
Ayon naman sa Office of the Civil Defense MIMAROPA, under maintenance umano ang seismic instrument ng Philippine Institute of Volcanology and Seismology (PHIVOLCS) sa bayan ng Odiongan, Romblon kaya hindi nila nababantayan ang pag galaw ng lupa sa kalapit na mga bayan.
Dagdag pa ng OCD-MIMAROPA, sinabi umano sa kanila ng PHIVOLCS na ang ilang barangay sa San Andres ay nadadaanan ng Tablas Fault kaya maaring minor tremors ang kanilang nararamdaman.
“The minor tremors being felt in the area may be attributed to faulting activity of the aforementioned fault,” ayon sa OCD-MIMAROPA.
