Nakaligtas sa pamamaril nitong ika-2 ng Disyembre ang manager ng isang trucking service sa Barangay Poctoy, Odiongan, Romblon.
Kinilala siya ng Odiongan Municipal Police Station na si Vicente Martisa Mayuga, 48, manager ng Tablas Forwarder.
Ayon sa police report mula sa Odiongan Municipal Police Station, sinita ng biktima ang suspek na si Marcial Carandang nang ito ay mamitas ng bunga ng mangga na pag-mamayari ng biktima.
Bigla umanong tumigil sa panunugkit ang suspek at di umano ay pinaputukan si Mayuga na maswerte namang hindi tinamaan.
Agad namang tumakbo ang biktima sa loob ng warehouse at nagtago, bago tumawag ng pulis.
Nakuha ng mga tauhan ng Odiongan Municipal Police Station sa lugar ang isang depormadong “slug” mula sa hindi pa tukoy na kalibre ng baril.
Ayon sa pulisya, may dati ng hidwaan ang suspek at biktima.
