Naitala ng Romblon Police Provincial Office (RPPO) ang 25% na pagbaba sa mga insidente ng aksidente sa kalsada sa lalawigan sa ikatlong quarter ng 2026, batay sa Road Crash Monitoring Report nito.
Ayon sa datos ng RPPO, umabot sa 55 ang naitalang road crash incidents mula Hulyo hanggang Setyembre 2026, mas mababa kumpara sa 73 insidente sa kaparehong panahon noong 2025. Katumbas ito ng 18 insidenteng ibinaba o humigit-kumulang 25 porsiyentong pagbaba.
Noong Agosto, iniulat din ng RPPO ang pagbaba ng mga insidente ng aksidente sa kalsada sa mga datos nito para sa Hulyo at sa unang 22 araw ng Agosto 2026. Sa naunang ulat, na inilathala noong Agosto 25, iniugnay ng pulisya ang pagbaba sa pagpapatupad ng Project Ligtas Kalsada.
Inilunsad ang Project LIGTAS KALSADA noong July 2026, na naglalayong mabawasan ang mga aksidente sa pamamagitan ng pinaigting na police visibility, checkpoint operations, pagpapatupad ng mga batas-trapiko at mga kampanya sa pagpapalaganap ng impormasyon tungkol sa kaligtasan sa kalsada.
Kabilang din sa programa ang pakikipagtulungan ng RPPO sa Land Transportation Office (LTO), Highway Patrol Group (HPG), mga lokal na pamahalaan at iba pang stakeholder sa pagpapatupad ng mga hakbang para sa road safety.
Patuloy na nagsasagawa ang RPPO ng mga information drive at nagpapaalala sa mga motorista na sumunod sa mga batas-trapiko, gumamit ng angkop na safety gear at maging responsable sa pagmamaneho.
Ayon kay Provincial Director PCOL Rexton F. Sawi, ipagpapatuloy ng RPPO ang mga hakbang para sa kaligtasan sa kalsada at ang pakikipagtulungan sa mga katuwang na ahensiya at komunidad upang higit pang mabawasan ang mga aksidente sa lalawigan.
