Nagkaisa ang National Intelligence Coordinating Agency (NICA) MIMAROPA at Philippine Science High School–MIMAROPA Region Campus (PSHS-MRC) sa pagsasagawa ng MANA Mo 2026 Mural Painting Competition sa Romblon bilang bahagi ng pagdiriwang ng Maritime and Archipelagic Nation Awareness Month (MANA Mo) ngayong September.
Dalawampu’t limang estudyante mula sa PSHS-MRC ang lumahok sa patimpalak at hinati sa limang grupo, na bawat isa ay lumikha ng mural batay sa temang “Karapatan sa Karagatan, Sama-sama Nating Alagaan.”
Isinagawa ang kompetisyon sa pakikipagtulungan ng Philippine Ports Authority (PPA) at PSHS-MRC, sa suporta ng NICA MIMAROPA, upang maipakita ng mga estudyante ang kanilang kaalaman at pagkamalikhain sa pangangalaga sa karagatan at yamang-dagat.
Ayon kay Romeo Ongpoy Jr., Director ng PSHS-MRC, malaking bagay ang pakikipagtulungan ng paaralan sa NICA MIMAROPA, partikular sa mga aktibidad na nagbibigay ng karagdagang kaalaman at kamalayan sa mga estudyante.
Sinabi ni Ongpoy na hindi lamang mural painting competition ang mga aktibidad na kanilang pinaplano kasama ang NICA, kundi maging mga symposium at seminar para sa mga estudyante ng PISAY.
Nagpasalamat naman ang NICA MIMAROPA sa PSHS-MRC sa patuloy na pagtanggap at pakikipagtulungan sa kanilang mga programa at aktibidad para sa mga estudyante.
Ang MANA Mo, o Maritime and Archipelagic Nation Awareness Month, ay ipinagdiriwang tuwing September alinsunod sa Presidential Proclamation No. 316, s. 2017. Layunin nitong palawakin ang kamalayan ng publiko tungkol sa pagiging maritime at archipelagic nation ng Pilipinas at hikayatin ang mga ahensya ng pamahalaan, lokal na pamahalaan, paaralan at iba pang sektor na makilahok sa mga programa para sa pangangalaga at responsableng paggamit ng maritime domain.
Ngayong taon, kasabay din ng MANA Mo ang ika-10 anibersaryo ng 2016 South China Sea Arbitral Award, na kabilang sa mga kontekstong binibigyang-diin sa pambansang paggunita.
