Nanawagan si Romblon Governor Trina Firmalo-Fabic na baguhin at palawakin ang pamantayan sa pagbibigay ng social pension upang maisama rin ang mga senior citizen na tumatanggap ng maliit na pension mula sa Social Security System at Government Service Insurance System.
Inihayag ito ng gobernador sa kanyang talumpati sa ginanap na Elderly Filipino Week Celebration sa bayan ng Looc na dinaluhan ng mga senior citizen, opisyal ng Office for Senior Citizens Affairs (OSCA), Federation of Senior Citizens Associations, at mga lokal na opisyal ng lalawigan.
Ayon kay Firmalo-Fabic, dapat ding mabigyan ng pagkakataon na makatanggap ng social pension ang mga nakatatanda na may mababang pension mula sa SSS o GSIS.
“Sa tingin ko po, mali na ang social pension ay para lang sa mga walang SSS o GSIS. Kung ang SSS o GSIS na pension mo ay less than ₱5,000, dapat eligible pa rin for social pension kasi pinaghirapan naman ’yon ng ating mga seniors,” pahayag ng gobernador.
Ipinaliwanag din ni Firmalo-Fabic ang kasalukuyang sitwasyon ng Universal Social Pension sa bansa. Aniya, bagama’t may umiiral nang batas kaugnay nito, wala pa umanong pormal na gabay at pondong ibinababa mula sa pambansang pamahalaan para sa ganap na pagpapatupad nito, kaya nananatiling limitado ang bilang ng mga kwalipikadong benepisyaryo sa bawat munisipyo.
Kaugnay nito, hiniling ng gobernador sa Sangguniang Panlalawigan na magpasa ng resolusyon na ipapadala sa Office of the President at National Commission of Senior Citizens (NCSC) upang mabigyan ng konsiderasyon ang mga senior citizen na may mababang pension mula sa SSS at GSIS.
Samantala, bilang bahagi ng pagdiriwang ng Elderly Filipino Week sa Looc, naglaan si Gov. Firmalo-Fabic at mga miyembro ng Sangguniang Panlalawigan ng karagdagang ₱25,000 para sa raffle ng mga dumalo sa aktibidad.
