Pitong iba pang panukalang batas na naglalayong magdeklara ng mga tourism destination, tourism development area, at ecotourism at heritage sites sa iba’t ibang bahagi ng Romblon ang inaprubahan ng House Committee on Tourism sa isinagawang pagpupulong ng komite.
Pinangunahan ni Cong. Budoy, Chairperson ng House Committee on Tourism, ang pagpupulong na tumalakay sa mga panukalang batas para sa pagpapaunlad ng turismo, pangangalaga sa mga pamanang pangkultura, at kaligtasan at kapakanan ng mga turista.
Kabuuang 102 House Bills ang isinailalim sa konsiderasyon ng komite, kabilang ang siyam na panukala para sa pagtatalaga ng mga pambansang tourism capitals, isang panukala para sa pagtatatag ng Ifugao Rice Terraces Commission, apat na panukala hinggil sa proteksyon at kaligtasan ng mga turista, at 88 panukala para sa deklarasyon at pagpapaunlad ng iba’t ibang tourism at ecotourism destinations sa bansa.
Bukod sa panukalang ideklara ang Romblon bilang “Marble Capital of the Philippines,” kabilang sa mga panukalang isinusulong para sa lalawigan ang mga sumusunod:
- HB 4026 – Pagdedeklara sa Municipality of Concepcion bilang Tourism Development Area;
- HB 4027 – Pagdedeklara sa Municipality of Banton bilang Ecotourism and Heritage Destination;
- HB 4229 – Pagdedeklara sa Municipality of Romblon bilang Tourism Destination;
- HB 4428 – Pagdedeklara sa Blue Hole Underwater Park sa Barangay Cawayan, San Agustin bilang Tourism Destination;
- HB 4429 – Pagdedeklara sa Ruins of Cotta “La Fuerza de Guintigui-an” sa Barangay Cagboaya, San Agustin bilang Tourism Site;
- HB 4430 – Pagdedeklara sa Gorda Point Lighthouse sa Barangay Cawayan, San Agustin bilang Tourism Site; at
- HB 9299 – Pagdedeklara sa Municipality of Calatrava bilang Tourism Destination.
Matapos ang deliberasyon, inaprubahan ng komite ang mga panukalang batas hinggil sa deklarasyon at pagpapaunlad ng iba’t ibang tourism at ecotourism destinations, subject to amendments and style, kasama ang kani-kanilang Committee Reports.
Ayon kay Cong. Budoy, patuloy ang pagsusulong ng turismo na nagbibigay-halaga sa mga yaman, kultura, kasaysayan at mga komunidad upang makalikha ng mas maraming oportunidad para sa mga Pilipino.
