Nakipag-ugnayan ang Unified Romblon Contractors Association (URCA) sa Technical Education and Skills Development Authority (TESDA) para sa pagsasagawa ng assessment sa mga heavy equipment operators na nagtatrabaho sa mga miyembrong local contractors sa lalawigan.
Ayon sa URCA, bahagi ito ng kanilang layunin na mas mapalakas ang lokal na workforce at mas maging lokal ang pagkuha ng mga heavy equipment operators para sa mga construction project ng mga contractor na kabilang sa kanilang grupo.
Mahalaga umano ang pagkakaroon ng National Certificate (NC) ng mga operator upang makatulong na matiyak na taglay nila ang kinakailangang kasanayan at kakayahan sa tamang paggamit at pagpapatakbo ng heavy equipment.
Sa ilalim ng inisyatiba, sasagutin ng URCA ang gastusin para sa assessment ng kanilang mga empleyadong heavy equipment operators.
Ayon naman sa TESDA, isasagawa ang assessment mula September 28 hanggang October 2, 2026. Inaasahang manggagaling pa sa Palawan ang mga assessor na magsasagawa ng pagsusuri sa mga operator.
Layunin ng assessment na masukat at mapatunayan ang kasanayan ng mga heavy equipment operators batay sa itinakdang pamantayan para sa kanilang qualification.
Para sa URCA, makatutulong ang programa hindi lamang sa mga contractor kundi maging sa mga manggagawang Romblomanon sa pamamagitan ng pagkakaroon ng mas maraming locally qualified at certified heavy equipment operators.
Inaasahan din na sa pamamagitan ng pagkakaroon ng mga sertipikadong operator, mas mapapalakas ang kalidad at kaligtasan ng mga construction activities na isinasagawa ng mga lokal na contractor sa lalawigan.
