Hinikayat ni PIA Romblon Information Center Manager Paul Jaysent Fos ang mga campus journalist ng San Andres National High School na maging aktibo sa pagsusulong ng tama at beripikadong impormasyon upang makatulong sa paglaban sa pagkalat ng fake news.
Ginawa ni Fos ang panawagan sa isinagawang Memorandum of Agreement (MOA) signing sa pagitan ng San Andres National High School–Special Program in Journalism (SANHS-SPJ) at Romblon News Network (RNN) noong September 25 sa San Andres, Romblon.
Si Fos ang founder ng Romblon News Network.
Binigyang-diin niya ang mahalagang papel ng campus journalists sa paghubog ng isang komunidad na mapanuri sa impormasyong nakikita at nababasa, lalo na sa panahon ng mabilis na pagkalat ng impormasyon sa social media.
“Mahalaga ang pagiging aktibo ng mga campus journalist dahil dito pa lamang sa paaralan ay maaari na nating simulan ang paglaban sa fake news. Kailangan nating matutong mag-verify ng impormasyon at tiyaking tama at responsable ang bawat impormasyong ating ibinabahagi,” ani Fos.
Ayon kay Fos, hindi lamang professional journalists ang may responsibilidad na labanan ang maling impormasyon, dahil maaari rin itong magsimula sa mga paaralan sa pamamagitan ng campus journalism.
Sa ilalim ng partnership, maaaring magsumite ang The Bridge at mga kwalipikadong student journalist ng mga news article, feature story, opinion piece at iba pang journalistic materials sa RNN para sa posibleng publication, na daraan sa editorial review at fact-checking.
Layunin ng partnership na maisulong ang responsible journalism at mabigyan ang mga student journalist ng praktikal na karanasan sa news writing, reporting, research, interviewing, fact-checking at editing.
Discussion about this post